HABASH: TAA YA WAPALESTINA ILIYOZIMIKA

·         Afa akiangalia mapambano ya Gaza kwenye televisheni

KWA miaka zaidi ya 41 Dk. George Habash amekuwa nguzo ya mapambano ya Wapalestina. Kwa maana hiyo, kifo chake, kilichotokea mwishoni mwa wiki, kimeacha pengo jingine kubwa kwa Wapalestina; na bila shaka kiasi fulani cha  ahueni kwa Israel.

Kwa mujibu wa maelezo ya mkewe, Hilda Habash, mpambanaji huyo wa Palestina alifariki mjini Amman wakati akiangalia taarifa ya habari ya televisheni iliyokuwa ikionyesha mapambano yanayoendelea hivi sasa Ukanda wa Gaza.

“Wakati wa kipindi cha kuugua kwake madaktari walikuwa wakimwambia kuwa maumivu na mateso yake ni sawa na maumivu na mateso wanayoyapata wakazi wa Gaza hivi sasa ambako umwagaji damu umepamba moto,” alisema Hilda.

Dk.George Habash au Dk. GH, kama wapiganaji wengi wa Kipalestina walivyozoea kumwita, ndiye aliyeanzisha chama cha ukombozi wa Palestina  cha Popular Front for the Liberation of Palestine (PFLP) mwaka 1967. PFLP ni moja ya vikundi vingi vya Kipalestina vilivyokuwa vikiipa sana tabu Israel katika miaka ya 70 na 80.

Kwa miaka mingi tu PFLP kilikuwa na ushawishi na mvuto mkubwa ndani ya Chama cha Ukombozi wa Palestina cha PLO. Ni chama ambacho kilitumia kila aina ya mbinu, ukiwemo ugaidi, kuhakikisha agenda ya Palestina inasikilizwa na dunia nzima.

Mara kadhaa kiliandaa na kutekeleza mipango ya utekaji ndege za abiria za Israel au zile za nchi zenye mahusiano na Israel, jambo lililokifanya kiogopwe na kuheshimiwa sawa na kile cha Fatah kilichokuwa kikiongozwa na Yasser Arafat ambaye sasa naye ni marehemu.

George Habash alizaliwa mwaka 1926 katika familia ya Kikristo ya Lydda (Sehemu ya Israel ambayo sasa inafahamika kwa jina la Lod). Mwaka 1948 familia hiyo ililazimika kukimbilia Beirut baada ya taifa la Israel kuanzishwa.

Ni katika Beirut ambako George Habash alivutiwa na fani ya tiba na hivyo kujiunga na Chuo Kikuu cha Marekani cha Beirut – American University of Beirut, kusomea udaktari wa tiba.

Lakini ukiachilia mbali mapenzi yake mapya katika fani ya tiba, siasa ndiyo iliyokuwa kivutio chake kikubwa tangu akiwa mtoto. Tangu yu kijana mdogo, alipenda kujitangaza kwamba yeye ni mwanamapinduzi wa Kiarabu. Haikushangaza, hivyo basi,  alipojiunga baadaye  na kikundi kilichoitwa “Youth of Vengeance” ambacho kilihamasisha Waarabu kuwashambulia viongozi wa serikali za Kiarabu waliokuwa na msimamo laini dhidi ya Israel.

Akiwa amehamasishwa na juhudi za kuwaunganisha Waarabu zilizokuwa zikifanywa na Rais wa zamani wa Misri, Gamal Abdel Nasser, George Habash, kwa miaka mingi, alijenga imani kwamba ni muungano wa nchi za Kiarabu tu unaoweza kuikomboa Palestina kutoka kwa udhalimu wa Wayahudi.

Lakini baada ya ushindi mkubwa wa Israel wa mwaka 1967 katika vita ile ya siku sita dhidi ya majeshi ya Misri, Syria na Jordan, imani hiyo ya George Habash kwamba Umoja wa Waarabu (Pan-Arabism) ndiyo ungeikomboa Palestina, ilianza kufifia na mwishowe kutoweka.

Hali hiyo na ukweli kwamba alikuwa haelewani na Arafat, ilimchochea kuanzisha kikundi chake mwenyewe cha mapambano  cha PFLP mwaka huo huo wa 1967.

Katika taarifa yake ya kwanza kuitoa baada ya kuunda kikundi hicho, George Habash alitamka “lugha pekee ambayo adui anaielewa ni ile ya mapambano ya kimapinduzi.”

Kwa hakika, George Habash alikuwa hatanii kwani mwaka mmoja baadaye, Julai 1968, PFLP kiliandaa na kutekeleza mpango wa kuiteka nyara ndege ya abiria ya Shirika la Ndege la Israel la El Al. Ndege hiyo ilikuwa ikitokea Rome kwenda Tel Aviv.

Tukio hilo lililozua hisia tofauti sehemu mbalimbali duniani liliashiria kuanza rasmi kwa mbinu mpya ya utekaji nyara katika mapambano ya Palestina dhidi ya Israel.

Kwa kiasi fulani Habash alifanikiwa kuhakikisha suala la Palestina linakuwa kila mara katika agenda ya dunia, lakini katika Israel na mataifa ya Ulaya wengi walimchukulia kuwa si mwanamapinduzi wa kweli bali ni gaidi.

Mnamo Septemba 1970 Habash na wapiganaji wake wa PFLP waliteka ndege nne za mataifa ya Ulaya. Ndege tatu kati ya hizo zililazimishwa kutua katika kiwanja kidogo cha Jordan, tukio ambalo lilisababisha kufumuka kwa vita ya wenyewe kwa wenyewe katika nchi hiyo. Vita hiyo ya wenyewe kwa wenyewe ndiyo iliyosababisha Habash na wapiganaji wake wa PFLP kukimbia Jordan na kuhamia Lebanon.

Lakini hata pamoja na shughuli za PFLP kuhamia Lebanon na baadaye Syria, Habash bado alihakikisha kundi lake linakuwa na nguvu kupita vikundi vingine vyote vya Kipalestina, ukiondoa cha Fatah cha Arafat.

Moja ya matukio makubwa ambayo Habash atakumbukwa nayo ni lile la Mei 1972 alipofanikiwa kuvikutanisha vikundi vitatu maarufu duniani vya kigaidi katika mkutano uliofanyika katika kambi ya wakimbizi Lebanon. Vikundi hivyo ni Republican Army cha Ireland, Baader Meinhof Group na Japanese Red Army.

Ni mwezi huo huo ambapo wapiganaji wa PFLP kwa kushirikiana na wale wa Japanese Red Army walivamia Uwanja wa Ndege wa Kimataifa wa Lod wa Israel na kuua watu 26.

Miaka minne baadaye wapiganaji wa PFLP wakishirikiana na wapiganaji wa Baader Meinhof Group waliiteka ndege ya Air France iliyokuwa inakwenda Tel Aviv na kuilazimisha kutua kwenye uwanja wa Entebbe nchini Uganda. Sakata hilo lilimalizika baada ya makomandoo wa Israel kuuvamia uwanja huo na kuokoa mateka hao ambao wengi walikuwa Wayahudi.

Kama mafahali wawili hawawezi kukaa zizi moja, basi, ndivyo ilivyokuwa pia kwa Habash na Arafat. Wawili hao walikuwa wakitofautiana kwa mambo mengi, na ndiyo sababu Habash alifikia uamuzi wa kuanzisha kikundi chake mwenyewe cha PFLP.

Wakati Arafat alipoanzisha kampeni katika nchi za Kiarabu ya kuzishawishi kukiunga mkono Fatah badala ya PFLP, Habash alilazimika kuzigeukia nchi za Russia na China na kuziomba zikiunge mkono kikundi chake katika mapambano dhidi ya udhalimu wa Israel.

Uhasama kati ya wawili hao ulizidi kuongezeka katika miaka ya tisini; hasa baada ya Arafat na kikundi chake cha Fatah kukubali kukaa katika meza ya majadiliano na Israel, hatua ambayo Habash aliipinga na kuiita ni ya kisaliti kwa Wapalestina.

Ni katika msingi huo huo Habash aliyapinga vikali Makubaliano ya Oslo ambayo yalitiwa saini mwaka 1993 kati ya Yasser Arafat na aliyekuwa Waziri Mkuu wa Israel, Yitzhak Rabin.

Baada ya makubaliano hayo kutiwa saini, Habash alikataa kwenda katika maeneo waliyotengewa Wapalestina ingawa Israel ilimpa kibali cha kuingia huko kwa ajili ya mkutano ulioitishwa mwaka 1996. Dk. Habash aliamini kwamba kama akikanyaga katika ardhi ya maeneo hayo itatafsiriwa kuwa anayakubali na kuyaheshimu Makubaliano ya Oslo.

Lakini kiasi alivyokataa kuyakubali Makubaliano ya Oslo na kuendelea kushikilia mtutu wa bunduki kuwa ndiyo njia pekee ya kumaliza tatizo la Palestina, ndivyo pia chama chake cha PFLP, kilichokuwa na mwelekeo wa Ki-Marxist, kilivyotengwa na kupungua umaarufu duniani.

Hali hiyo ilisababisha kufumuka kwa shinikizo ndani ya PFLP la kumtaka ajiuzulu. Shinikizo hilo lilipoongezeka, hatimaye,  Habash alifikia uamuzi wa kuachia ngazi, Aprili 2000. Hata hivyo, mpaka wakati anajiuzulu tayari PFLP kilishapokwa umaarufu na kikundi kingine chenye msimamo mkali cha Hamas.

Baada ya kujiuzulu uongozi, Habash aliendelea kuishi Amman ambako alifariki mwishoni mwa wiki akiwa na umri wa miaka 82.

- CHANZO: http://www.raiamwema.co.tz