JONAS MALHEIRO SAVIMBI

Jonas Malheiro Savimbi alizaliwa Agosti 3, 1934 katika mji wa Munhango, Jimbo la Moxico katika kitongoji cha Reli ya Benguela, nchini Angola.

Savimbi, alikuwa mwanasiasa na mwanzilishi wa Chama cha Unita, ambaye pia alikuwa kiongozi wa Jeshi la Ukombozi la Unita, kama ambavyo mwenyewe alikuwa akiliita.

Baba yake Savimbi alikuwa Mkuu wa Kituo cha Reli Benguela enzi za ukoloni na pia mchungaji wa Kanisa la Kiprotestant lilioanzishwa na Misionari kutoka Marekani.

Awali, kundi la waasi wa Unita lilianza kama kundi la wapiganaji wa msituni waliokuwa wakipambana na utawala wa kikoloni wa Ureno kuanzia mwaka 1966 mpaka mwaka 1974.

Baada ya kupatikana uhuru mwaka 1975, Savimbi na kundi lake waligeuka na kuwa kundi la waasi na kuanzisha vita dhidi ya Serikali ya Chama cha MPLA.

Uasi huo ulizaa vita ya wenyewe kwa wenyewe kuanzia mwaka 1975 mpaka mpaka Februari 22 mwaka 2002. Vita ilikomaa baada ya Savimbi kuuawa na wanajeshi wa Angola.

Savimbi alikuwa kiongozi pekee wa waasi wa msituni

waliopigana ndani ya Angola mpaka taifa hilo lilipopata uhuru.

Mwaka 1991, Unita ilikubali kusaini mkataba wa kusitisha mapigano na MPLA na kukubaliana kuwa chama hicho cha Savimbi kiwe huru kushiriki chaguzi mbalimbali.

Hata hivyo, pamoja na kushiriki chaguzi hizo, Unita ilishindwa kupata ushindi mwaka 1992, jambo lililomchukiza Savimbi na kuamua kurudi msituni kupambana na Serikali ya Angola.

Inadaiwa kuwa Savimbi alikuwa akipata msaada wa kijeshi kutoka nchi za Afrika Kusini, China na Marekani, wakati Serikali ya Angola ilikuwa ikipata msaada kutoka Urusi.

Savimbi aliyelelewa kwenye mazingira ya Kikristu na kusoma shule za seminari za Kiprotestant na Katoliki, anadaiwa kunusurika majaribio 15 ya kuuawa kutoka kwa wanajeshi wa Angola.

Hata hivyo, mwisho wa Savimbi ulikuwa Februari 22, 2002 alipovamiwa kwenye ngome yake ya kijeshi kwenye mji alikozaliwa na kuuawa na majeshi ya Angola, yaliyokuwa yakimsaka kwa muda mrefu.

Taarifa za kuuawa Savimbi zilipokelewa kwa shangwe nchini Angola kutokana kuonekana kama kiini cha kukosekana kwa amani nchini huko na majirani zake.

Kituo cha Televisheni cha Serikali kilionyesha picha ya Savimbi akiwa amelazwa chini bila nguo, huku akiwa na matundu 15 ya risasi sehemu mbalimbali mwilini na nyingi kichwani.

Kuna taarifa zinadai kuwa, Savimbi alikamatwa akiwa hai kutokana na majeraha aliyopata wakati wa mapambano, na aliuawa baada ya kuteswa kwani alipigwa risasi kwenye miguu na mikono yote, shingoni na kifuani.

Baada ya kuuawa Savimbi, nafasi yake ilichukuliwa na Antonio Dembo, ambaye alijeruhiwa katika shambulizi lililomuua Savimbi na siku 10 baadaye alifariki dunia. Wiki sita baada ya kuuawa Savimbi, mkataba wa makubaliano ya kusitisha mapigano kati ya UNITA na MPLA ulisainiwa, huku ikiiacha Angola kugawanyika kisiasa katika makundi mawili, MPLA na UNITA.

Savimbi anakumbukwa kwa ukatili mkubwa aliolekeza majeshi yake kufanya dhidi ya majeshi ya Angola katika vita iliyodumu kwa miaka 26 kabla ya kumalizika.

Mara kadhaa alikuwa akiwataka askari wake kuwaua kikatili askari wa Jeshi la Angola kwenye uwanja wa mapambano. Hakutaka mateka, aliamuru wauawe kukatwa vichwa au kufa kwa kupewa mateso makali.

CHANZO: kutoka katika vyanzo mbalimbali katika mtandao.